DBHrako material osagarria

ZER DA ESKU ARTEAN DUZUNA?

Honako hau DBH 1. eta 2. mailako Literatur Sorkuntza eta Oinarrizko Hizkuntza Trebetasunak aukerako irakasgaiak lantzeko material osagarria da.

Jarraian bi irakasgai hauetarako materiala eta hau erabiltzeko azalpenak ageri dira. Lana hiru ataletan banatua dago: Literatur Sorkuntza, Oinarrizko Hizkuntza Trebetasunak eta Liburuak hizpide.

Atal bakoitzean sarrera orokor bat ikusiko duzue eta jarraian irakasgai hori osatzen duten edukien izenak ageri dira. Izen horien gainean klikatuz gero, atal horren edukiak ikusi ahal izanen dituzte. Literatur Sorkuntzan, adibidez, lehen orrian sarrera orokorra aurkituko duzue eta jarraian Literatur Sorkuntza osatzen duten bost atalak: ipuinak, bertsoak, zinema, kazetaritza eta publizitatea. Hauetako bakoitzaren barnean, sarrera txiki bat eta taula bat ikusiko dituzue. Taulan, ariketen izenak, irakasle/ikasle fitxak eta ariketa bakoitzaren helburua zein den zehazten dira.

Era berean, Literatur Sorkuntza eta Oinarrizko Hizkuntza Trebetasunak irakasgaietan ageri diren ariketak elkarren osagarri dira; hau da, ipuinetan mintzamena, irakurriaren ulermena, entzunaren ulermena nahiz idazmena lantzeko ariketak aurkituko dituzue, eta alderantziz.

Lan hau egiteko, zenbait ikastetxetara egindako bisitak eta beste zenbait irakaslerengandik jasotako beharrak, iritziak eta iradokizunak izan ditugu oinarri. Ez genuke aipatu gabe utzi nahi, material hau guztia sortzeko hainbat iturritako materiala erabili dugula. Iturri guztiak jarri ditugu, eta zenbaitetan link-a bera ere eskaini dugu jatorrizko orriarekin. Eskerrak eman nahi dizkiegu iturri hauei guztiei.

NOLA ERABILI?

Ariketa hauek beste edozein mailatan erabil daitezke (bere horretan edo testuak eta ariketak egokituz).

Ariketa solteak dira, ez dira unitate baten inguruan sortutakoak, baina nolabaiteko lotura dutenez, komeni da ordena jakin batean egitea. Horrela, esate baterako, ipuingintzari dagokion atalean, ariketak egiteko ordena bat proposatzen dugu. Izan ere, bukaerako ariketetan gauza asko jakintzat ematen dira; hortaz, ez da komeni bukaerako ariketak hasieran egitea. Gauza bera gertatuko da beste alorretan ere: bertsolaritzan, kazetaritzan, publizitatean...

Beraz, asko dira ariketak eta, irakasleak berak aukeratu behar ditu egokienak. Irakasleentzat baliagarri izatea espero dugu; azken batean, irakaslearen lana baita ariketa edo testua taldearentzat egokia den ikustea eta, behar izatekotan, egokitzea. Ariketaren bat aldatu edo moldatu nahi izanez gero, aski da interesatzen zaigun dokumentua edo ariketa sailkatu eta Word dokumentu batean itsastea.

Hasi dugun lan hau ez da lan itxia eta, hortaz, urtez urte osatu beharrekoa izanen da. Irakasleon ardura da egin denaren inguruan iradokizunak egitea eta ariketa berriak gehitzea, denon artean ariketa sorta oparoa bil dezagun. Beraz, iradokizunen bat edo beste baduzue, ariketaren bat eginez gero... interesgarria litzateke EIBZren posta elektronikora idaztea (eibz@educacion.navarra.es), denon artean material hau aberasten eta handitzen joateko. Gisa honetan, denok erabiltzeko materiala edukiko dugu eskuragai eta elkarri lana erraztuko diogu.