Literatur Sorkuntza / DBH 1

Literatur Sorkuntza aukerako irakasgairako ariketak prestatzeko Curriculuma hartu dugu kontuan. Era askotako ariketak prestatu ditugu (ordenagailuekin lan egin nahi duten irakasleentzat, paperean lan egin nahi dutenentzat, ikasleek parte hartzea maite dutenentzat, saio bakarrerako, saio bat baino gehiagotan lantzeko...) ahalik eta irakasle gehienengana iristea izan baita asmoa. Curriculumean zehazten diren eduki gehienak landu ditugu, hirugarren hiruhilekoari dagokiona izan ezik, izan ere, gure ustez, bada testu akademikoak lantzeko nahikoa ariketa eta testu liburu. Beraz, hauek dira landu ditugun edukiak:

	Ipuinak
	Bertsoak
	Kazetaritza
	Zinema
	Publizitatea

Era berean, gure ustez, garrantzitsua da ariketa hauen nolakotasuna azpimarratzea, izan ere, material osagarria da eta ikastetxeetan dagoen materiala osatzera heldu da. Esan bezala, ariketa sorta oparoa da, era askotakoa eta irakasleen lana erraztea espero dugu.

Atal bakoitzaren hasierako orrian, sarrera txiki bat eta taula bat ikusiko dituzue. Taularen ezkerraldean ariketen izena ageri da, gero, irakaslearentzat edo ikaslearentzat fitxak aukeratzeko zutabea eta ondotik, helburu didaktikoa markatzen duen zutabea; beraz, irakasleak honen arabera, lehen begiratu batean, bat edo beste aukeratzeko parada izanen du.

Honetaz gain, ez genuke aipatu gabe utzi nahi ariketen ordena librea-edo dela, baina bukaerako ariketak egiteko gauza asko jakintzat hartzen direnez, komeni da bukaera aldekoak hasieran ez egitea eta helburua kontuan hartzea.