Galdera:

Karteltxo hau ikusi dut:

“Gabon festak zoriontsuak opa dizkizuegu bihotz-bihotzez”

Nire ustez, “Gabon festa zoriontsuak…” izango litzateke egokia. Zer deritzozue?

Erantzuna:

Egun on:

Zure senak ongi adierazi dizun bezala, karteltxoan ikusitakoa okerra da eta “Gabon festa zoriontsuak…” da zuzena.

Dena den, “festa” hitza erabili gabe esateko ohitura dago; honela:

“Gabon zoriontsuak opa dizkizuegu bihotz-bihotzez”

Bada halako zalantzak argitzen eta lanak arintzen lagunduko dizun liburuxka bat:

• Debagoieneko udaletako euskara zerbitzuak, Idatziak: gonbitak, zorion agurrak, oharrak… Donostia: Elkarlanean, 2003. Ondorengoak dira liburuxka horretan Gabonetan zoriontzeko proposatzen dituzten oharrak:

– Gabon zoriontsuak eta urte berri on.

– Eguberri on eta urte zoriontsua izan ditzazuela.

– Igaro Gabonak bakean eta pozik, eta urte berri on.

– Gure zorionik zintzoena Gabon hauetan, eta urte berrian osasuna opa dizut.

– Gabon egun hauek indarberritu dezatela gizon-emakumeen elkartasun sentimendua, eta urte   berriak zoriona eta ongizatea ekar ditzala gurera eta besteenera, eta berdintasuna gizon eta emakume guztiontzat.

Besterik gabe, ongi izan

Dokumentua: http://www.debagoiena.com/Idatziak

Data: 2005/12/07