Lekuko pasiboak konplizeak gara

Mikel Garcia Idiakez / 2016-11-21 / 253 hitz

Denok egin dugu noizbait: whatsap taldean idatzi duten txiste iraingarriaren aurrean isildu, edo bulegoan lankideak egin duen etorkinei buruzko aipamen txatxua erantzunik gabe utzi, parrandan tabernan neskari ipurdia ukitu diotela ikusi eta beste aldera begiratu, pareko espaloian eskutik emanda doazen bi mutilei marikoi deitzen ari zaizkien arren entzungorrarena egin, lagunarteko makina bat komentario arbuiagarri pasatzen utzi… Bullyingaren aurkako metodo arrakastatsuek erakutsi digutenez, ordea, lekukoon rola funtsezkoa da: gure jarrerak erasotzaileari hegoak eman diezazkioke, edo errotik moztu dezake erasoa.

Jarrera zuzena zein den badakigu, baina beti ez da erraza esku hartzea (eraso bat ikusi eta parte hartzea albiste bihurtzen da maiz). Muturreko adibideetara jo gabe, dena den, asko da gure egunerokoan egin dezakeguna, taldearen indarrak kendu baitiezaioke zilegitasuna gorrototik, intolerantziatik, ezjakintasunetik, superiotitate sentimendutik eraikitzen den diskurtso gutxiesgarriari.

“Aldageletako txisteak”, gizonen arteko kontuak

Donald Trumpek emakumeei buruz esandakoen harira, gizon ugarik pribatuan eta gizonez inguraturik antzeko adierazpenak egiten dituztela dio Shaun R. Harper irakasleak, euren maskulinitatea sendotzeko modua dela. “Txantxa hauetan parte hartzen dutenak saritu egiten ditu taldeak, baina parte ez hartzea erabakitzen dutenen eta bereziki adierazpen matxista horiek kritikatzen dituztenen maskulinitatea auzitan jartzen da eta sozialki kanpoan geratzeko arriskua dute”. Hala ere, argi du komentario sexistak geldiarazteko modu bakarra inguruko beste gizonek horiek salatzea dela eta beraz erantzukizunez jokatzera animatzen ditu gizonezkoak.

“Isiltasunarekin, erasotzailea ari zara babesten –gogoratu zigun Oihana Etxebarrieta Bilgune Feministako kideak–; aldiz, biktimaren alde jartzen bazara, pertsona hori ahalduntzen ari zara, pertsona horrek erasotzaileari aurre egitea ahalbidetzen ari zara, bakarrik sentitzen bada eta babesik ez badu zaila izango duelako ezer egitea”.

Utzi erantzuna

Zure e-posta helbidea ez da argitaratuko.