Mikel Garcia Idiakez / 2016-12-12 / 275 hitz
“Izan gaitezen norberak nahi duena”, dio soineko arrosez jantzitako mutilaren posterrak. Argazkia Nicolaigarden haurreskolan dago, Suediako hiriburuan, eta ongi irudikatzen du ikastetxearen oinarri nagusietakoa: mutil eta nesken arteko bereizketa kontziente/inkontzienteak eta genero-estereotipoek ez dute lekurik bertan. Lanketa integrala eta berezia egiten dute horretarako, 5 urte arteko umeentzako eskola honetan.
Stockholmeko ikastetxean, ipuinak irakurtzerakoan rolak aldatzen dituzte, tradizionalki maskulinoak diren pertsonaiak femenino bihurtuz eta alderantziz, edo neskek printzearen zatia irakurtzen dute eta mutilek printzesarena; izenordain neutroa darabilte (mutil eta nesken izenordaina erabili ordez) eta komunikazioa ez sexista izatea zaintzen dute hitz, esamolde eta adieretan; “aita” eta “ama” bezalako hitzen ordez orokorragoak darabiltzate, “haurrek duten familia eredua dutela ere, eroso sentitu daitezen”; nahastuta dauden jolas, gai eta jostailu mota anitzak probatzera animatzen dituzte umeak; ikasleen eredu diren heinean, garrantzia ematen diote genero estereotipoak apurtzeko irakasleek eurek duten jarrerari (aipatzekoa, 36 irakasleetatik erdia gizonak direla, ezohikoa haurrezkuntzan)… Eta batez ere, aukera aniztasuna jorratzen dute etengabe: “Bizitzan denek aukera berdinak dituztela ulertzen lagundu nahi diegu haurrei, duten generoa dutela ere, pertsona aske gisa garatu daitezen”, diote haurreskolako arduradunek.
Doktrinamendua da ala gizarteak baldintzatu baino lehen egin beharreko lanketa?
Kritikak izan dituzte, umeak doktrinatzen ari omen direla-eta. “Guraso batzuk beldur dira –diote ikastetxetik–, genero berdintasunean oinarritutako heziketaren bidez euren seme-alabei aukerak ukatuko dizkiegulakoan. Adibidez, alde maskulinoarekin zerikusia duena kenduko diegula mutilei, ez diegula futbolean edo autoekin jolasten utziko. Eta berdin neskekin. Baina ez da hala, ez diogu inori ezer kentzen, alderantziz, gehitu baino ez dugu egiten. Hala ikusten dugu guk. Inportantea da umeek eztabaidatu eta zalantzan jarri ditzatela eredu maskulino eta femeninoa, gizarteak euren ideiak baldintzatu baino lehen”.
Gaiari lotuta:
– Estereotipoetatik aske diren neska-mutilak hezteko unitate didaktikoa.