BERRIAlagunak

Agur t´erdi, bazkide eta BERRIAlagunok:

Hona bildu gara berriz ere urteroko hitzordura, iazko ekitaldiaren berri emateko.

Euskal kazetaritzarentzat ez da urte errazik ezagutu; ekonomiari buruz ari gara, jakina. Bestelakorik esan gurako genukeen arren, 2014a ere ez da samurra izan BERRIA Taldeko kazetentzat. Alferrik da: etengabe aldats gora aritzea neke handia da, eta, batez ere, egoera oso zaurgarrian jartzen ditu enpresa eta langileak. Hala ere, ez dugu etsiko ondoen egiten dakiguna egiteko: kazetaritza-lan sendo eta serioa, kalitatezkoa, euskarazkoa eta geuretik pentsatu eta sortutakoa; euskal kulturaren parte aktibo izan eta hedatu. Horregatik, zorionez, urteko emaitza immaterialak neurtzean, balantze oso ona egin behar dugu.

Dakizuenez, BERRIA egunkaria kazetaritza egiteko joera aurreratuenei begira aritu izan da beti, bere irakurleei istorioak kontatzeko eredu onenak eskaintzeko ahaleginean, eta garaian garaikora egokituta. 2014an, aurreko ekitaldian hasitako egitasmoari lotu zitzaion bete-betean: webgunearen berritzearekin ia batera egin zuen berria.info helbidetik berria.eus domeinu berrirako jauzia.

Alabaina, ez da Interneteko domeinu-aldaketa hutsean geratu egindako berrikuntza: lantalde guztiaren barne-hausnarketaren ondorioz eta BERRIAlagunen ekarpenei esker, etxeko antolakuntza bera irauli da, kazeta-lan berritzaileari bide emateko. Prozesu parte-hartzaile honekin, lan prozesuak eta egitura moldatzea lehenetsi da, arlo digitalean zertzen diren egiteko berrientzat irtenbide egokiena delakoan: batetik, papereko kazetan toki handiagoa emanda analisiari eta gogoeta sakonei, eta, bestetik, berria.eus atari digitalean egunerokoak eskatzen duen bat-batekotasunari.

Ekitaldi berean, 2014an alegia, badok.info euskal musikaren datutegi eta artxibo handia berritu eta sustatu zuen gure Taldeak. Hori ere publiko zabalari eskainitako leihoa da, berria.eus atariaren barruan, geure kulturaren erakusgarri eta gozagarri.

Hizkuntza Politikaren Sailak (HPS) hartutako erabakiak ilundu zuen gure urtea, zoritxarrez. Aurreko ekitaldian baino 200.000 euro pasa gutxiago esleitu zituen diru-laguntzetan BERRIArentzat. Jaurlaritzak egindako Hedabideak deialdian ‹‹irismena›› deitu duten irizpidea aplikatuta, kalte nabarmena egin zaio BERRIAri. Izaera nazionala zein lokala izan, agerkari guztiak berdindu ziren, eta guztiei baremazio bera aplikatu. Baina bistan da: Euskal Herri osora egunero zabaltzen den kazetak eta herri batean banatzen den hilabetekariak ez lukete puntuazio bera izan behar. Ez baitira parekideak.

Ebazpenari errekurtsoa jarri diogu, eta, gainera, Euskal Herriko Unibertsitateko, Mondragon Unibertsitateko eta Deustuko Unibertsitateko adituek egindako txostenak aurkeztu dira Hizkuntza Politikako Sailean. “Hekimen”1 Euskal Hedabideen Elkarteak ere hainbat gomendio egin dizkio Jaurlaritzari, aurtengo diru-laguntzetan irizpideak zuzendu eta aldatzeko.

BERRIA Taldeak urtea zorrik gabe amaitu zuen, orriotan ikusiko duzuen moduan; gure langileek beren soldata izoztua dute 2008tik, eta BERRIAlagunek diru-ekarpen franko egin dute: eskerrik asko guztiei. Politikaren egitekoa beti izan da herritik eratutako sormen-produkzioei bidea egiten laguntzea. Halaxe espero (eta behar) dugu izatea Jaurlaritzaren betebeharra.

Beatriz Zabalondo (Administrazio Kontseiluko lehendakaria): 2014ko balantzea.
Moldatua.

1.- OHARRA. Testuko “Hekimen” hitza dela-eta, ortografiari dagokionez ekimen hitzarekin nahasmendurik sor ez dadin, argituko dugu “Hekimen” euskal hedabideek osatutako elkarte baten izena dela, hedabide + ekimen loturatik berariaz sortutakoa hain zuzen.