Liburuak hizpide

DBH 2. mailako Oinarrizko Hizkuntza Trebetasunak irakasgaiaren Curriculumean ageri diren edukiak lantzeko (ortografia, testuak sortu eta berrikustea, narrazio testuak ulertzea...) eta irakurzaletasuna bultzatzeko ariketa multzoa sortu dugu. Curriculumean zehazten diren lau idazleetatik bi aukeratu ditugu, Mariasun Landa eta Patxi Zubizarreta, eta haien liburu banaren lanketa prestatu dugu. Berez, Oinarrizko Hizkuntza Trebetasunetarako prestatutako ariketak izan arren, ariketa sorta hauek DBH 1. mailan ere erabil daitezke (edo beste mailaren batean, moldatuta beti ere).

Atlas sentimentala (Patxi Zubizarreta)

Helburua ez da liburua irakurri eta ulermen ariketak egitea, gure asmoa bestelakoa da. Izan ere, eguneroko generoa lantzeaz gain, beste kultura batean barneratzeko aukera ematen digu Atlas sentimentalak. Hortaz, irakurriaren ulermena eta lau trebetasunak lantzen dira, baina bide batez ikasleak liburuaren mamia ateratzera, literaturaz gozatzera bultzatu nahi ditugu.

Izan ere, hemen proposatzen ditugun jarduerak nahiz ariketak egunerokoaren ordenari jarraituz ageri dira eta hiru ataletan banatuta daude:
- Liburua irakurri baino lehen atalean, hasi aurretik egin daitezkeen jarduerak dituzu.
- Liburua irakurri bitartean atala, izenak dioen moduan, liburua irakurri ahal egin behar da.
- Bukaeran izeneko atalean, liburua irakurri ondoren egiteko ariketak aurkituko dituzue.

Galtzerdi suizida (Mariaxun Landa)

Liburu honek ere antzeko egitura du: irakurtzen hasi baino lehen, irakurri bitartean eta bukaeran egiteko ariketak. Antolaketa bestelakoa da liburu honetan: zazpi atal ageri dira, atal bakoitzeko galtzerdi bat eta galtzerdi bakoitzaren barruan jarduerak eta ariketak. Liburua klasean ozen irakurtzeko prestatuta dago. Ariketek batez ere mintzamena lantzea dute helburu. Polita izan daiteke, kolore ezberdineko zazpi galtzerdi gelan zintzilikatzea, eta atal bakoitzarekin bukatzean, galtzerdia kentzea.

Galtzerdi suizidak eskaintzen ahal digu sentimenduak kanporatzeko bidea eta hau da, hain zuzen ere, ariketa batzuen helburua. Honetaz gain, lau trebetasunak eta hizkuntzarekin jolasteko ariketak ere aurkituko dituzue.