EIBZ

 

OINARRIZKO HIZKUNTZA TREBETASUNAK
--- IRAKASLEA ---

 
mintzatu
irakurri
idatzi
entzun

Zaharregia

 

Zuzenketa orria

40?

Zaharregia, sosten barik ibiltzeko; gazteegia, eskotea estaltzeko. Zaharregia, praka gerri baxuak erosteko; gazteegia, tergalezko gris ilunak janzteko. Zaharregia, tintarik gabeko ile luzea eramateko; gazteegia, ile motz kanaduna erakusteko. Zaharregia, inkestetako protagonista izateko; gazteegia, helduenenean agertzeko.
Zaharregia, gau-pasa egiteko; gazteegia, sofan lotan geratzeko. Zaharregia, amets hutsen bila joateko; gazteegia, mundua den bezala onartzeko. Zaharregia, mutilen atzetik ibiltzeko; gazteegia, gizonari men egiteko. Zaharregia, seme-alaben hizkeraaritzeko; gazteegia, gurasoena erabiltzeko. Zaharregia, etxe propioa izateko; gazteegia, norberaren txokoa ez deseatzeko. Zaharregia, zimurrik ez ikusteko; gazteegia, zimurrok operatzeko.
Zaharregia, Lurraren geroa Marten bilatzeko; gazteegia, ikerketarik ez onartzeko. Zaharregia kanpin dendan lo egiteko; gazteegia, Hoteleko aire girotua arnasteko. Zaharregia, abentura bila ibiltzeko; gazteegia lasaitasuna helburu bihurtzeko. Zaharregia, pailazo sudurra janzteko; gazteegia, inauterietan aspertzeko. Zaharregia mitxelin-bistan ibiltzeko; gazteegia, faxa janzteko. Zaharregia, ipuinetik bizitzeko; gazteegia fikzioei uko egiteko. Zaharregia, hanburgesak deseatzeko; gazteegia, igandeetan porru-patatak jateko.
Zaharregia, politikoen hitza sinesteko; gazteegia, utopiak baztertzeko. Zaharregia, hizkuntza txikien galera ez ikusteko; gazteegia, maite den ororen heriotza onartzeko. Zaharregia, belarriak berriz zulatzeko; gazteegia, belarri-zuloak itxi eta ondokoari ez entzuteko.
Idazle bati irakurri berri diot hogei urterekin familiarengandik ihesi ibili ondoren, orain, hogei urteren buruan, norberaren familia zaindu beharra dugunez, kontraesanez betetako belaunaldia garela eta hortik datorkigula krisialdia. Ez dakit; agian, 80ko hamarkadan, handia eta zabala ikusten genuen aurretik genuena eta, egun, dagoeneko toki zabal horretara iritsiak garenez gero, halabeharrez estuago ikusi behar dugu etorkizuna.
Izanak izan, egia da ez garela atzokoak. Eta egia da, baita ere, denbora badoala, eta errekako uraren antzera doala, gainera. Aitzitik, errekako ura itsasora doa beti, eta itsasoa ez da batere estua; zabal-zabala, baizik.
Gezurra ote da 40koen krisialdiarena?

Iturria:www.ikasbil.net

--->>>ikaslea<<<---