OINARRIZKO HIZKUNTZA TREBETASUNAK --- IRAKASLEA ---

Txisteak I

Zuzentzeko denboran, ikasle bakoitzari hauetako txiste bana kontatzeko eskatuko diogu.

Zuzenketa orria

Gizon bat herriko ertzain batengana joan zen eta esan zion:
- Azeleragailua, bolantea, frenoa... lapurtu dizkidate autotik.
- Zatoz hemendik bi egunetara –erantzun zion ertzainak.
Hala, joan zen handik bi egunetara eta ertzainak galdetu zion:
- Zer, aurkitu al dituzu?
- Ez, lapurtu ere ez zizkidaten egin. Ba al dakizu zer gertatu zen? Mozkorturik nengoela eta atzeko eserlekuan jarri nintzela.

 

Lehengo aldiz Madrila joan zen kanpotar batek galdetu zion han aurkitu zuen beste bati:
- Hemendik gertu al dago Puerta del sol?
- 59. autobusa hartzen baduzu bertaraino eramango zaitu.
Handik hiru edo lau ordutara leku berean ikusi zuen kanpotarra autobusaren zain eta galdetu zion:
- Baina hemen al zaude oraindik?
- Bai, 52 autobus pasatu dira oraindik.

 

Gizon bat, kale bazterrean, bizkarrari hazka eta hazka ari zen. Lagun batek galdetu zion:
- Zer gertatzen zaizu, Inixio?
- Ez dakit... arkakusoak edo... izugarrizko hazkura daukat.
- Nik esango dizut zer egin. Igurtzi ezazu bizkarra alkoholez eta ez duzu hazkurarik izango.
- Ez, ez. Ez noa horrelakorik egitera. Mozkortu gabe ere nahiko lan ematen didate arkakusoek eta zer izango ote litzateke mozkortuta jartzen direnean?

 

Eroetxeko zuzendariak proba bat egin nahi izan zuen eroen gaixotasuna zein neurritakoa zen jakiteko. Piszina hustu zuen eta esan zien eroei:
- Salto denok, igerian egin.
Batek ez beste denek salto egin zuten. Eta zuzendariak pentsatu zuen bere artean: “Hauxe egongo da hemen sanoena”. Eta galdetu zion eroari:
- Aizu, zuk zergatik ez duzu saltorik egin?
Eta eroak erantzun:
- Oraindik digestiorik egin ez dudalako.

 

- Zer ordu da?
- Ordubata. Oraintxe jo du eliz dorreko erlojuan.
- Ziur al zaude?
- Ziur egongo ez naiz, bada? Bi aldiz entzun dut behintzat eta...

 

Irakaslea ahalegin guztiak egiten ari da ikasleek aditzak ikas ditzaten:
- Ea, Txomin! Nola izango litzateke ni bizi naiz aditza geroaldian?
Eta Txominek, ongi pentsatu ondoren, honela erantzun zion:
- Zu hilko zara.

 

Irakasleak ikasleei:
- Orain idazlan bat egingo duzue. Hau da gaia: “Alferkeriaren ondorioak”.
Handik ordubetera papera zuri-zuri, ezer idatzi gabe, entregatzen du Pitxuk.
- Zer da hau, Pitxu? –galdetu dio irakasleak.
- Horixe da alferkeriaren ondorioa –erantzun dio Pitxuk lasai asko.

 

- Orain, hasieran, egunean mila pezeta irabaziko duzu eta geroago mila eta bostehunera igoko dizut soldata.
- Orduan geroago etorriko naiz.

 

Irakasleak ikasleari:
- Zein da animaliarik produktiboena?
- Oiloa, jauna!
- Eta zergatik?
- Hil eta gero eta jaio baino lehen jan dezakegulako.

 

Adineko gizon bat sendagilearengana doa. Aspalditik zebilen ezkerreko hankako minez. Eman zion sendagileari gertatzen zitzaionaren berri eta honek erantzun zion:
- Min hori adinarena da. Urteak, urteak, gizon!
Eta gizonak, haserre, honela erantzun zion:
- Zer urte eta zer demonio! Beste hanka ere adin berekoa da eta ez dit ba minik ematen...

 

Gorrak:
- Ez ezazu nirekin hizketan denborarik gal, gorra naiz eta.
- Ez nintzen zurekin hizketan ari... txiklea mastikatzen ari nintzen..

 

- Lanean ari nintzen bitartean ez erretzeko esan zidan sendagileak.
- Eta egin al duzu esandakoa?
- Bai. Geroztik ez dut lanik egin..

 

Irakaslearen eta ikaslearen arteko elkarrizketa:
- Zenbat hezur dauzka zure gorputzak?
- 208, jauna.
- Burugogorra! Ez al nizun esan atzo 207 hezur bakarrik dauzkala giza gorputzak?
- Baina gaur oliba hezur bat irentsi dut ordea...

Iturria:

J. Ormazabal. Esaera zaharrak eta txiste berriak. Elkar, 1998

 

--->>><<<---