Kasu marka sintagma osoaren amaieran bakarrik ager daiteke:

• Unibertsitateko errektoreorde Edurne Mendiluzek aurkeztu du txostena.
• Edurne Mendiluze Unibertsitateko errektoreordeari aurkeztu diote txostena.
  

Horrelakoetan, bistan da, lehen izenak ez daramala mugatzailerik:

• Unibertsitateko errektoreorde(*a) Edurne Mendiluzek aurkeztu du txostena.

Mugatzailea izenaren beraren osagai egina duten izen bereziek, ordea (Benedikto XVI.a, Antso Azkarra edo Pernando Amezketarra bezalakoek, alegia), gorde egiten dute mugatzailea aposizioan ere:

• Benedikto XVI.a Erromako Aita Santuak (*Benedikto XVI. Erromako Aita Santuak).
• Antso Azkarra errege ausartari (*Antso Azkar errege ausartari).
• Pernando Amezketarra bertsolari ezagunaren ibilerak (*Pernando Amezketar bertsolari ezagunaren ibilerak).

Izen sintagma osoak aposatzen direnean, berriz, komunztadura egitea da ohikoena, hondarkia sintagma aposatuetan ere jarriz:

• Nire lagun Ferminek, piano jotzaile trebeak, kontzertu asko eman ditu aurten.
• Fermin Garro irakasleari, lizentziadun berri denari, eman diote lanpostu hori.
• Zure lagunarekin, unibertsitateko irakaslearekin, mintzatu naiz gaur.

Komunztadurarik gabeko aposizioak lekukotasun urriagoa du tradizioan, batez ere perpaus barruan kokatua dagoenak, eta, hortaz, ez da gomendatzekoa:

• ?? Nire lagun Ferminek, piano jotzaile trebea, kontzertu asko eman ditu aurten.
• ?? Fermin Garro irakasleari, lizentziadun berri dena, eman diote lanpostu hori.
• ?? Zure lagunarekin, Unibertsitateko irakaslea, mintzatu naiz gaur.
  

Errazago onartzen dira horrelakoak, tarteki izaera argia denean:

• Gure herriko alkateak -musikazale amorratua bera- begi onez ikusi du kontzertu gela berria egiteko proiektua.
• Haren etxean -aski zabala, ene ustez- erraz kabituko gara denok.
• Datorren larunbatean -hilak zortzi- hasiko da ehiza garaia.

Araugintza I

Bibliografia
Helbide elektronikoak
Inprimatzeko bertsioa
Edukiak alfabetikoki