Kasu-marka bera dakarten sintagmak beti junta daitezke:

• Bilboko jokalariek eta Bermeoko arraunlariek batzarra egin dute.
• Zuri, niri eta beste askori gertatu zaigu.
• Zure etxeaz eta gure lanbide berriaz mintzatu dira.
• Baionatik, Bilbotik eta Gasteiztik omen datoz ikasle horiek.

Pertsona izenordainak elkartzen direnean, beti erantsi behar da kasu-marka:

• Zuk eta guk egingo dugu (eta ez *zu eta guk egingo dugu).
• Niri, zuri eta beste lagunei gertatu zaigu (eta ez *ni, zu eta beste lagunei gertatu zaigu).
• Gutaz eta zuetaz mintzo dira (eta ez *gu eta zuetaz mintzo dira).

c)

Halaber, singularreko sintagmetan, kasu-marka eranstea gomendatzen da:

• Itsasoan eta lehorrean bizi diren narrastiak.
• Amarekin eta amamarekin bizi da.

Juntatzen diren izenak oso hurbilekoak direnean, edo izenlagunaz nahiz izenondoaz lagundurik doazenean, ardatz anitzeko sintagma osa daiteke, kasu-marka amaieran soilik ezarriz:

• Gorputz eta arimatik atera den oihua.
• Bere emazte eta alabari galdetu zien.

d)

Pluraleko sintagmetan, aukeran izaten da guztiei kasu-marka jarri edo amaieran soilik jarri:

• Itsaso, mendi eta basamortuetan ibili da. (=Itsasoetan, mendietan eta basamortuetan ibili da)
• Maite ditut lagun eta ahaideak.
• Adiskide eta lankideei kontatu diet.
• Meatze eta lantegietatik atera den oihua.

Determinatzailea duten kasu-markarik gabeko izen sintagmak ezin junta daitezke kasu-markadun sintagma batekin:

*	Mendia eta itsasotik heldu da ura.		Menditik eta itsasotik heldu da ura.
*	Adiskideak eta lagunez mintzatu zara.		Adiskide eta lagunez mintzatu zara.
*	Burua eta zangoei behatu nien.		Buruari eta zangoei behatu nien.
*	Gizon hau eta emakume hark esango dizute.		Gizon honek eta emakume hark esango dizute.

Genitibodun sintagmetan ere ez da zilegi sintagma mugatu soila eta genitiboko sintagma juntatzea:

*	lkastolak eta gobernuaren arteko bilerak.		lkastolen eta gobernuaren arteko bilerak.
*	Irakaslea eta ikaslearen arteko harremana.		Irakaslearen eta ikaslearen arteko harremana.

Araugintza I

Bibliografia
Helbide elektronikoak
Inprimatzeko bertsioa
Edukiak alfabetikoki