EIBZko liburutegian maileguan har daitezkeen liburuen artean A ereduko 4., 5. eta 6. mailetarako hiru liburu hauek daude:
Maletetan, liburuez gain, CD bat ere badago, liburuen lanketa egiteko honako materialarekin: programazioak, sekuentzia didaktikoak, fitxak, ebaluazioa eta jokoak. CDa maletetan izango duzun arren, hemen ere deskargatzeko aukera duzu: CDa deskargatu
Liburu labur hau hartzei buruzko ezagutza liburua da. Zenbat hartz mota dauden eta non bizi diren azaltzeaz gain, haien ohitura eta ezaugarri batzuen berri ematen du. Horretarako, testu xumea du, kolorezko irudiez apaindua. Azken orrietan, bi denbora-pasa eta haien erantzunak ditu.
(Lehen Hezkuntzako bigarren ziklorako aproposa izan daiteke).
Ttarttalo argitaletxeko liburu hau tolesgarria da, eta 360 graduko etxea edo 3Dko etxea dela esan daiteke. Kartoi lodiz egina dago, eta norberak asmatu behar du istorioa. Etxeko egongela, sukaldea, haurren logela eta bainugela ditu marraztuta, eta irudiei dagokion hiztegia ageri da.
Memoria nahiz hiztegia lantzeko aproposa da eta gauzen bila jolasean aritzeko aukera ematen du.
Testurik gabeko album grafikoa da liburu hau, beraz, hainbat etapatan erabiltzeko aproposa da; adinaren eta mailaren arabera, jarduera desberdinak egiteko balio du: hiztegia ikasteko, istorioak sortzeko, ahozko adierazpena lantzeko…
Azalean, “bizitzan dena aldatzen da, etengabe…” esaldia ageri da, eta barruan adibideak ematen ditu, irudien bidez. Zenbait elementuren bilakaera eta garapena agertzen da: fruitua zuhaitza, beldarra tximeleta, harria eskultura, oiloa arrautza… Batzuetan, bi orritan baino ez eta, beste batzuetan, orri gehiagotan.
Bologna 2015eko sarituetako bat da.
Afrikako ipuin tradizonal batean oinarritutako komikia. Aitona bat bere tribuko haurrei, haiek hala eskatuta, txabola batean istorio bat kontatzen hasiko zaie, hain zuzen ere, kafearen istorioa. Saba izeneko neskato batek eta Kafe izeneko Abisiniako ahuntz basati batek landare magiko bat aurkituko dute. Gorabehera batzuen ondoren, kafe izena emango diote landare magikoari, eta aurkikuntzak euren bizimodua aldatuko du.
Komikiko irudiek txandaka erakusten dituzte elezaharraren pasarteak eta txabolako kontaketakoak. Haurrek euren iritzia emango dute eta gertatuko denari buruzko hipotesiak egingo dituztenez, gelan gauza bera egiteko aukera ematen du.
(Lehen Hezkuntzan nahiz Bigarren Hezkuntzan lantzeko aproposa izan daiteke).
Irakurtzeko, jolasteko eta ondo pasatzeko liburu magikoa. Letra larriz idatzia dago. Liburuaren lehen orrialdean biribil hori bat azaltzen da fondo zuriaren gainean. Handik aurrera, irakurleak biribil horrekin zer gertatzen den ikusteko jarraibideak jasoko ditu.
(Haur Hezkuntzan nahiz Lehen Hezkuntzan erabiltzeko aproposa izan daiteke).
Koloreak, zenbakiak eta kokapena lantzeko egokia da.
7 atalez osatutako liburu labur honek istorio samurra kontatzen du. Gasolindegiko langilea da narratzailea. Protagonistetako bat familiarekin uda pasatzera Iparraldetik Afrikara doan neskatxa bat da: Fatima edo Bakarrik. Bestea, berriz, gasolindegian abandonatuta utzi duten katu bat, Buztangabe. Bien artean harreman berezia sortuko da; bakardadea arintzeko, batak bestearengan aurkituko du babesa. Gorabehera batzuen ondoren, amaiera zoriontsua izango du istorioak.
Jokin Mitxelenaren irudi adierazkorrek apaintzen dute istorioa.
(Lehen Hezkuntzako hirugarren zikloan lantzeko aproposa izan daiteke)
Isabela eta Genobeba saguzarrek mundua egunez ikustea erabaki dute, horretarako, betaurreko beltzak aurkitu beharko dituzte, argiak min ematen baitie. Hainbat animalia aurkituko dituzte bidean, eta guztiei galdetuko diete ea betaurreko beltzik ba ote duten. Horretan-horretan, mundua ikusteko helburua beste baterako utzi beharko dute, eguna pasatuko zaie-eta.
(Lehen Hezkuntzako hirugarren zikloan lantzeko aproposa izan daiteke)
Berria egunkariak larunbatetan argitaratzen duen “Mantangorri” gehigarrian, duela gutxi arte, animaliei buruzko orrialde bat azaltzen zen astero (2010-2012). Bertan, zenbait animaliaren ohiturak eta bitxikeriak jasotzen dira.
EIBZn urte horietan atera zirenak bildu ditugu liburuxka batean, eskurago izateko eta errazago erabiltzeko.
Espero dezagun ikasleen gustukoa izatea!
Mila esker @berria