Ordu bat eta erdiak da/dira?

Galdera

Euskaltzaindiaren erabakiak irakurri ondoren, oraindik badut argitu gabeko zalantza bat.
Ordu bata, ordu bata eta erdiak, ordu bata eta laurden… bai, baina da edo dira?
Ordu bata eta erdiak dira? Ordu bata eta laurden da? edo Ordu bata eta laurden dira?

Erantzuna

Hau da euskara baturako joera: “ordu bata da“, minuturik ez dagoelako; baina, minutuak eranstean, “ordu bata eta laurden dira” edo “ordu bat eta erdiak dira“.

Halere, Euskaltzaindiaren Jagonet zerbitzuan Miren Azkaratek erantzundakoa irakurrita, badirudi ez direla baztertzekoak norberaren euskalkiko joerak ere. Hauxe zioen Azkaratek, hitzez hitz: “Badirudi ordu bat eta erdiak den neurrian, hau da, plural marka ezartzen zaion neurrian dira izango litzatekeela, baina onena bakoitzaren euskalkiko erabilera gordetzea izan daiteke”. Galdera eta erantzuna osorik irakurri nahi badituzu, egin klik hemen.

Nolanahi ere, eta berriz ere zure galderari helduta, beste kontu hau ere argitu nahi nuke:

“Ordu bata eta erdiak dira? Ordu bata eta laurden da? ala Ordu bata eta laurden dira?”

Euskara batuan ordu bat eta erdiak” izan behar du, “bat” mugatu gabe, (ordu bi eta erdiak, hiru eta erdiak, bost eta erdiak… bezalaxe), eta ez ordu bata eta erdiak.

“Laurden”-ekin, berriz, bi eratara esan daiteke: ordu bata eta laurden edo ordu bat eta laurdenak. Ikusi zer dioen Euskaltzaindiak 35. arauan, 185. orrialdean:

3. Laurdena honela adierazten da: ordu bat eta laurdenak, oren / ordu bata eta laurden, ordu bi eta laurdenak, oren / ordu biak eta laurden, hirurak eta laurden, hiru eta laurdenak, hirurak eta laurdenetan, hiru eta laurdenetan, bostak laurden gutxi(ago), e.a.

Atala Hizkuntza, etiketak , , , , egilea .

Honi buruz: EIBZ

EIBZ edo Euskararen Irakaskuntzarako Baliabide Zentroa Nafarroako Gobernuaren Hezkuntza Departamentuko zentro ofiziala da, Hizkuntzen eta Arte Ikasketen Zerbitzuko Euskara Atalaren mendekoa. EIBZk hiru atal nagusi ditu eta ongi zehazturiko helburuak eta eginkizunak: a) Prestakuntza arloa: Euskara maila eguneratzeko eta hobetzeko ikastaroak ematea. Euskarazko ikastaroak diseinatzea eta ikastaro berriak proposatzea. Irakasleei ikasmaterialak euskaraz sortzeko aholkuak ematea eta sortzen laguntzea. b) Hizkuntz Egiaztapen eta Zuzenketaren arloa: Nafarroako Gobernuaren EGArako probak prestatzea. Irakasleei euskararen gaineko kontsulta zerbitzua eskaintzea: oinarrizko hezkuntza terminologia, hizkuntza arauak, kalitatezko testuak, baliabide didaktikoak. Lankidetza hitzarmenak sustatzea euskarazko hizkuntza baliabideak jaso, hedatu eta erabili nahi dituzten ikastetxeekin. c) Informazioaren eta Baliabideen arloa: Euskararen irakaskuntzari lotutako fondo dokumentala, bibliografikoa eta teknologia berrien gainekoa sortzea eta eguneratzea. Baliabide Zentroko fondo bibliografikoak, ikus-entzunezkoak eta informatikoak zaintzea, sailkatzea eta eguneratzea. Baliabide Zentroaren webgunea sortzea eta eguneratzea. Helbidea: Zubiarte kalea, 13 Uharte - 31620 Nafarroa

Utzi erantzuna

Zure e-posta helbidea ez da argitaratuko. Beharrezko eremuak * markatuta daude