Eskuartean duzun egitasmo hau DBH eta Batxilergoko ikasleen euskararekiko motibazio baikorra eta atxikimendua lantzeko oinarriak, ibilbideak eta baliabideak eskaintzeko jaio zen eta, gaur egun ere, bigarren hezkuntzak hartzen du gunearen espaziorik handiena. Hala ere, Haur Hezkuntza eta Lehen Hezkuntzako irakasleek ere ikasleen hizkuntza atxikipenari ekarpen handia egin diezaioketela jakinda, Motibazioa Sustatzeko Baliabideak gune honetan atal bat zabaldu dugu hezkuntzaren hasierako etapa horri begira: irakurleak menu nagusian aurkituko du: “Atxikimendua HH eta LH-n”
Proiektu honek arrakasta izateko irakasleen parte hartzea ezinbestekoa da, eta baita zentro osoarena ere, alegia, hezkuntza komunitateko kide guztien lana, ez noski maila berean, baina bai modu integratuan eta osotasunez bideratua.
Ikasleen jarrera baikorrak bultzatu nahi ditugu. Euskararen egoeraren jabe egin daitezen, dituzten bizipenetan eta esperientzietan oinarrituko dira, hau da, ikasleek pentsatzen eta sentitzen dutena azalaraztea bilatuko dugu. Haien bizipen eta esperientzietatik abiatuta motibazio kontzienterako ibilbidea egin dezaten eta hizkuntzaren erabileran eragiten duten faktoreen garrantziaz ohar daitezen. Eta erabilera gauza konplexua dela, hari-mutur ugari dituena ulertzera iritsi daitezen.
