Iritzi publikoaren indizea erakusten duen sare sozial bat jaio da: Swipp

Urtzi Urkizu / 2013-01-24 / 155 hitz

Twitterren dinamismoa eta Wikipediaren dentsitatea lortu nahi ditu tresnak, erabiltzaileen botoekin.

Urte eta erdiko lanaren ostean, Silicon Valleyn (AEB) Swipp.com sare soziala sortu du hamabost laguneko talde batek. Iritzi publikoa neurtzeko modua aldatzeko asmoa du tresna berriak, balore indize baten egituraren bitartez. Hau da, indize horretan pertsonak, produktuek eta ideiek kotizatuko dute. Erabiltzaileen botoen arabera funtzionatuko du indizeak.
«Edozein gairen inguruan jendeak pentsatzen duena jaso eta erakutsi nahi dugu», adierazi du Swippeko marketin eta komunikazio buru Frederik Hermannek. Tresnak Twitterreko eta Facebookeko jarraitzaile kopuruetatik harago jo nahi du. Twitterren «dinamismoa» eta Wikipediaren «dentsitatea» lortu bai, baina hortik harago jo eta iraultzaile izateko bokazioz sortu da.
Epe laburrean 200.000 erabiltzaile lortzeko itxaropena dute arduradunek. «Eta agian urtebetean milioi batera iritsi», dio Hermannek.
Swipp bost hizkuntzatan dago eskuragarri, eta iPhoneko aplikazio propioa du. Izena ematea doakoa da, baina Facebooken profil bat izatea beharrezkoa da. Swippek dagoeneko 4 milioi argazki ditu bere zerbitzaileetan, eta erabiltzaileek horiek bozka ditzakete.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude