Elixabete Garmendia Lasa / 2016-05-25 / 456 hitz
Paper zuriaren gainean errotuladore gorriz egindako marrazkia; ikusten dira tanke bat, hegazkin bat bonba jaurtitzen, pertsona txiki bat —umea izan daiteke— bera baino metrailadore handiagoarekin; ikusten dira gorputza zaurituta izan behar duten haur bat eta nagusi bat; hori denaren erdian dagoen eszena da esplizituena: gizonezko batek, pistola eskuan, tiro egin eta jotzen dio bularrean aldamenean daukanari; errotuladore beltza erabili du hemen egileak, gorria balarentzat eta hark eragindako odolarentzat utzita. Grezian, Katsikaseko errefuxiatu eremuan dagoen umeetako batek egina omen da marrazkia (BERRIA, 2016-05-20); Siriako gerratik ihesi irtendako ume batek.