Itxuraz antzekoak izan arren, ezberdinak dira esanahi aldetik. Marratxoz idatziek bikotea edo taldea adierazten dute: jaun-andreak, seme-alabak, neska-mutilak, senar-emazteak, anai-arrebak… Zehar marraz idatziek, berriz, edo bata edo bestea adierazi nahi dute: jauna/andrea, semea/alaba…

Honatx erabilera batzuk:

a) Gutun, ohar edo mezu elektroniko baten hasierako agurrean.

• Hartzaileari buruz gizonezkoa ala emakumezkoa den ez dakigunean:

Jauna/Andrea:

Zuzendari jauna/andrea:

• Gizonezko zein emakumezko, hartzaile guztiei batera bidali nahi diegunean:

Zuzendari jaun-andreak:

b) Esaldi baten barnean.

• “Semea edo alaba” adierazi nahi dugunean, hau da, bietako bat bakarrik:

-Zuen semea/alaba Haur Hezkuntzan matrikulatzeko epea bihar amaituko da.

              -Nola lagundu ahal diot semeari/alabari etxeko lanak egiten?

-*Lehenengo seme-alaba izatean, ez dute diru laguntzarik ematen.

• “Semeak eta alabak”, denak, adierazi nahi dugunean:

Hiru seme-alaba edo gehiago dituztenak hartzen dira familia ugaritzat.

Oharrak:

• Beste idazkera hauek testuinguru bakar batean ere ez dira zuzenak: *jaunandreak, *jaun andreak, *semealabak, *seme alabak…
• Esaldi baten barnean “bata” edo “bestea” adierazi nahi dugunean ―hots, bietako bat bakarrik―, biei jarri behar zaie kasu-marka. Adibidez: 14 urte baino gutxiagoko adingabeen kasuan, aitak/amak baliogabetuko du erreserba (eta ez 14 urte baino gutxiagoko adingabeen kasuan, aita/amak baliogabetuko du erreserba).