Askoren ustez, bi puntuen ondoren maiuskulaz idatzi behar da. Salbuespenak salbuespen, uste okerra da hori. Bi puntuen ondoren minuskulaz idatzi behar da, kontrako arrazoirik ez bada behintzat. Adibidez:

• Oso garbi du urteak bete aurretik zer egin nahi duen: marka ezarri.
• Hauek dira lau urtaroak: udaberria, uda, udazkena eta negua.
• Ordubetean bukatu zituen etxeko lanak: hautsa kendu, lisatu eta otordua prestatu.

Ikus dezagun noiz idatzi behar den maiuskulaz:

a) Bi puntuen ondoren datorren hitza maiuskulaz idazten dena denean (izen berezia, sigla…). Honatx adibide batzuk:

• Ipar Europako herrialdeak ezagutu zituzten: Norvegia, Suedia, Finlandia, Islandia eta Danimarka.
• Bi irakasgai irakasten ditu: Fisika eta Matematika.
• Iruñera joan aurretik, herrian bertan egin nituen nire lehen ikasketak: HH, LH eta DBH hain zuzen ere.

b) Bi puntuen ondoren hitzez hitzeko aipamena txertatzen denean (norbaiten hitzak). Honatx adibide batzuk:

• Valverde: “Sinestezina iruditzen zait partida hau galdu izana”.

Oharra: letra larrien, hots, maiuskulen erabilera zehazturik dago Letra larriak erabiltzeko irizpideak liburuxkan.