Okerrak: *emaidazu, *emaidan, *emaidak, *emaiguzu, *emaiguk, *emaigun, *esaidazu, *esaidak, *esaidan, *esaiguzu, *ekarridazu, *ekarridak, *ekarridan, *ekarridazue…

Zuzenak: emadazu, emadan, emadak, emaguzu, emaguk, emagun, esadazu, esadak, esadan, esaguzu, ekardak, ekardan, ekardazu, ekardazue…

Honatx Interneten aurkitutako zenbait akats:

-*Emaidazu titular bat.

-*Esaidazue ez naizela bakarra.

-*Emaiguzue plan bat eta mundua mugituko dugu.

-*Gugana bazatoz, ekarriguzu argiaren azken fakturaren kopia bat.

Honela behar dute euskara batuan:

-Emadazu titular bat.

-Esadazue ez naizela bakarra.

-Emaguzue plan bat eta mundua mugituko dugu.

-Gugana bazatoz, ekarguzu argiaren azken fakturaren kopia bat.

Maiz egiten den okerra da. Euskaltzaindiak euskara baturako onartutako formetan, tarteko -i- hori zuzena da soilik NORI hari edo haiei denean; honako adizki hauetan, alegia:

emaion emaiok	esaion esaiok	eramaion eramaiok	ekarrion ekarriok
emaiozu	esaiozu	eramaiozu	ekarriozu
emaiozue	esaiozue	eramaiozue	ekarriozue
emaien emaiek	esaien esaiek	eramaien eramaiek	ekarrien ekarriek
emaiezu	esaiezu	eramaiezu	ekarriezu
emaiezue	esaiezue	eramaiezue	ekarriezue

Gainerako pertsonetan -i- hori ez da zuzena.

Hauxe dator, hitzez hitz, Euskara Batuaren Eskuliburuko Aditz trinkoak (sintetikoak) izenburua duen sarreran.