Gaizki osatuta dago *europear hitza. Europa hitzetik datorrenez, europar da forma zuzena. Bide beretik: indoeuropar, eta ez *indoeuropear.
Okerrak: *europear, *indoeuropear
Utzi erantzuna
Kategoriaren artxiboa: Okerrak
Okerrak: *irtetzen, *irtetzea, *irtetzeko…
Esaldi hauek ez dira zuzenak:
- *Lau eta erdietan irtetzen gara eskolatik.
- *Kostako zaigu krisialdi honetatik irtetzea.
- *Kalera irtetzeko deia egin dute gizarte eragileek.
Honela behar dute zuzenak izateko:
- Lau eta erdietan irteten gara eskolatik.
- Kostako zaigu krisialdi honetatik irtetea.
- Kalera irteteko deia egin dute gizarte eragileek.
Okerra: *kokotaraino
*Kokotaraino nago edo *kokotaraino naukate bezalakoak ez dira zuzenak. Kokote da hitza eta ez *kokota. Hortaz: kokoteraino nago, kokoteraino naukate.
*eta abar luze bat: kalko desegokia.
Gaztelaniaren eraginez-edo, maiz entzun edota irakurri izan ditugu esaldi honen antzekoak:
*Eskualdeko artea, literatura, historia, etnografia eta abar luze bat landu ditugu ikastaroan.
Euskaltzaindiaren Hiztegi Batuan sarrera hau dator “abar” hitzaren azpian:
eta abar (eta abar luze bat kalko desegokia da; erabil horren ordez eta abar, eta abar)
Okerrak: *etentzen, *etentzea, *etentzeko…
Esaldi hauek ez dira zuzenak:
- *Aldioro etentzen du klasea galderaren bat egiteko.
- *Kontratua etentzea erabaki dute.
- *Lesioa zela eta, partida etentzeko eskatu zuen jokalariak.
Honela behar dute zuzenak izateko:
- Aldioro eteten du klasea galderaren bat egiteko.
- Kontratua etetea erabaki dute.
- Lesioa zela eta, partida eteteko eskatu zuen jokalariak.
Okerrak: *astelehenan, *asteazkenan…
*Astelehenan, *asteazkenan, *ostegunan, *ostiralan, *larunbatan okerrak dira. Zuzenak: astelehenean, asteazkenean, ostegunean, ostiralean, larunbatean.
Okerrak: *bilera eta gero, *atsedenaldia eta gero…
*Bilera eta gero, *atsedenaldia eta gero, *oporrak eta gero… bezalako sintagmak ez dira zuzenak. Bileraren ondoren, atsedenaldiaren ondoren, oporren ondoren… erabiltzeko dio Euskaltzaindiak Hiztegi Batuan.
Okerrak: *Astelehena, *Asteartea, *Asteazkena…
Astegunen izenak minuskula edo letra xehez idazten dira euskaraz: astelehena, asteartea, asteazkena, osteguna, ostirala, larunbata, igandea; eta ez letra larriz: *Astelehena, *Asteartea, *Asteazkena, *Osteguna, *Ostirala, *Larunbata, *Igandea.
Okerrak: *textu, *experimentu, *mixto…
*Textu, *experimentu, *mixto, *exklusibo, *exklusibotasun, *experientzia, *exportazio, *exponentzial, *extasi, *expediente… ez daude zuzen idatzita.
Idazkera zuzenak hauek dira: testu, esperimentu, misto, esklusibo, esklusibotasun, esperientzia, esportazio, esponentzial, estasi, espediente…