Maialen Unanue / 2013-01-27 / 620 hitz
‘Zapla!!’ komiki aldizkaria sortu dute Bergarako Garikoitz Garitanok eta Ion Leibarrek: hiru zenbaki kaleratu dituzte oraingoz, eta hurrengoa martxoan argitaratzea espero dute.
Marraztea atsegin dute, eta komikiak beti izan dituzte gustuko. Duela lau urte ingurutik buruan zuten Garikoitz Garitanok eta Ion Leibarrek euren afizioari bide emateko asmoa, baina 2011ko azaroan hasi ziren, azkenik, buruan zituzten ideia horiei gorputza ematen. Asteroko bilerak egiten hasi ziren, eta hala sortu zuten Zapla!! komiki aldizkaria. Hiru zenbaki kaleratu dituzte dagoeneko: azkena Getxoko Komiki Azokarako prestatu zuten. Laugarrena esku artean dute, eta martxoaren erdialdean argitaratzea espero dute.
Eskuz edo ordenagailuz, koloretan edo zuri-beltzean, norbere gustura marrazten dute Zapla!! aldizkarian parte hartzen duten marrazkilariek. Egungo egoera soziala kritikatu, historia kontatu, edo nahi dutena komikien bidez adierazten dute. Sortu ere, horretarako sortu baitzuten: bai Garitanok eta bai Leibarrek, zerbitzari gisa lan egiteaz gain, beste aldizkari batentzako marrazkiak egiten zituzten. Aldizkarian, Otamendi ezizenez sinatzen ditu marrazkiak Garitanok, eta Kuinbo ezizenez Leibarrek. Euren marrazkiak formatu oso jakinetara egokitu behar izaten zituzten, eta lortutako emaitzak ez ziren haien gustukoak izaten askotan. «Oso mugatuta zegoen gure lana, eta ez geunden gustura: guk nahi genuena egin nahi genuen, inolako presiorik gabe», azaldu du Garitanok.
Askatasuna zuten helburu, eta hein batean, hori islatzen du Zapla!! aldizkariak. Izan ere, aldizkariaren eduki nagusia komikiek osatzen dute, baina kolaboratzaileek aukera dute bestelakoak sartzeko ere: «Aldizkaria gure marrazkiak argitaratzeko sortu genuen, baina norbaitek bertsoak idatzi nahi baditu, poesia, edo beste zerbait, horiek guztiek ere badute lekua Zapla!!-n».
Azkeneko zenbakian, askotariko gaiak landu dituzte komikietan, errepideetako istorioak, gaupaseroen pasadizoak, AHTaren ingurukoak… Musikarien aldeko zutabe bat, denbora-pasak eta bertsoak ere argitaratu dituzte.
Bi lagun ziren lehen, eta, orain, sei laguneko taldea dira. Kolaboratzaileen bidez funtzionatzen dute —azken zenbakian hamazazpi egileren marrazkiak argitaratu dituzte—, baina seien artean adosten dute hurrengo zenbakiaren egitura. Inork aldizkarian parte hartu nahik balu, egileekin harremanetan jartzeko aukera du zaplafanzinea@gmail.com helbidera idatzita. Facebooken ere sortu dute orria, zaleei aldizkariaren inguruko berriak helarazteko.
Orain arteko zenbakiek 50 orri inguru dituzte, eta 500 ale atera dituzte bakoitzetik. Martxoan argitaratuko dute laugarrena, eta antzeko zifretan ibiliko da, Garitanoren ustez. Oraingoz, baina, ezingo dute afizioa ofizio bihurtu: «Han eta hemen lortzen dugun publizitatearekin, justu-justu lortzen dugu inprenta ordaintzea». Hori da aldizkariaren diru sarrera bakarra; dirua lortzeko bide berrien bila dabiltza, baina oraindik ez dute ezer jakinik buruan.
Orain, finantzaketaz gain, aldizkaria ezagutaraztea dute helburu. Oraingoz, Gipuzkoako hainbat herritan —Bergaran, Arrasaten, Aretxabaletan, Antzuolan eta Tolosan— eta Elorrion (Bizkaia) eskura daiteke Zapla!!. Kioskoetan aurkitu beharrean, tabernetan aurkituko du irakurleak aldizkaria, bi euroren truke; azken finean, lagunen bidez lortzen dute aldizkaria handik eta hemendik zabaltzea. Azken alea, adibidez, kontzertu baten sarrerarekin banatzea pentsatu dute.
Helburu edo muga
Zapla!! aldizkarian euskaraz eta gaztelaniaz idatzitako komikiak aurki daitezke. Hori ere egile bakoitzaren esku uzten dute, nahiz eta eztabaida bat edo besteren iturburu izan: «Gaztelaniaz idatzitakoak mugatu nahi ditugu. Kataluniako kolaboratzaile batek ez du euskaraz idatziko, ulertzekoa denez».
Komikiak euskaraz egitearen aldekoa da Garitano: «Beti egin dut nire ama hizkuntzaren alde, nahiz beste pertsona batzuk horrekin ados ez egon». Kontrako argudioak honako hauek izaten dira: «Egile batzuek diote zenbait bromak gaztelaniaz hobeto funtzionatzen dutela, edo horrela jende gehiagok irakurriko dituela euren komikiak». Norbaitek esan zion bezala, gaztelaniaz eginez gero irakurle multzoa handituko litzateke: «Hala izango da, ziurrenik, baina jende gehiagorengana heltzea ez da nire helburua. Gaztelaniarako joera hartuko balu, pentsatu egingo nuke jarraitu edo ez».
Batzuek muga ikusten duten tokian, besteek aukera ikusten dute. «Lehengo batean Bilboko lagun batek eskerrak eman zizkigun komikiak euskaraz egiteagatik!», gogorarazi du Garitanok.
Aldizkariaren bidez, ez dute helburu jakin bat lortu nahi, euren afizioari bidea ireki soilik. Agian, egunen batean, erreferentetzat dituzten marrazkigileak bezain entzutetsu izatea lortuko dute. Hiru marrazkilari dira Garitanoren gustukoenak: El Jueves aldizkariko Vizcarra, Argia-n kolaboratzen duen Asisko Urmeneta eta BERRIAn egunero Zakilixut zinta egiten duen Antton Olariaga.