Imanol Mercero / 2014-10-05 / 168 hitz
- Izenburua: Zorioneko hondamendia
- Idazlea: Adela Turin
- Ilustratzailea: Nella Bosnia
- Itzultzailea: Fernando Rey
- Argitaletxeak: Pamiela eta Kalandraka
Adela Turin aipatuta nahitaezkoa da feminista hitza gogora etortzea. Haur literatura aldarrikapen sozialak egiten hasi zenean, Adela Turinek emakumearen aldeko borroka haur literaturara ekartzeko ohorea eta lana hartu zuen.
Bere asmoak gauzatzeko Dalla parte delle bambine deitzen den bilduma sortu zuen, eta bertan mordoxka bat titulu argitaratu zuen. Joan den urtean bi ale euskaratu zituen Pamiela argitaletxeak (ikus hemerotekan iazko kritika, 2013-10-06 datarekin argitaratu zena), eta aurten beste bi kaleratu berri ditu: Zorioneko hondamendia eta Bonobo betaurrekodunen egiazko historia.
Iaz bezala, aurten ere esan beharra dago Turinen bilduma honetan alderdi narratiboa nahiko baldintzatuta agertzen dela, eta, mezu berdinzaleak zabaltzeko zeregin horretan, balio hezitzaileak gaina hartzen diola literaturari. Eta hala ere, literatur lan txukunak dira, irudimenez originalak, eta teknika narratiboa menderatzen dutenak, nahiz eta, mezua zabaldu behar horretan, kontakizunari moteltasuna erantsi zaion.
Nella Bosniaren ilustrazioa eraginkorra da, ikusgarria eta ausarta, bere garaian egiten ziren moldeen araberakoa, baten bati modaz kanpokoa irudituko zaion arren.