Gorka Bereziartua Mitxelena / 2016-01-19 / 238 hitz

Netflixek iaz egin bezala, AEBetako HBO telebista kateak Internet bidezko zerbitzuak eskainiko ditu Hego Euskal Herrian 2016. urtean.

Kultuzko telesailen jarraitzaileek ezagutuko dute, The Sopranos, The Wire, Boarwalk Empire, Game of Thrones eta abar ekoiztu dituen katea delako, alegia, diletante kategoria berri bat –seriefiloa– sortzeko gai izan den enpresa, baita nire gusturako neurritik irteten den baieztapenen bat ere –“zinemak ezin du lehiatu telesail hauekin” eta antzekoak –.

Bueno, ba ez dago HBOren online zerbitzuaren estreinaldi datarik, are gutxiago preziorik, baina katearen nazioarteko eduki hedapenerako buru Simon Suttonek Bloombergi adierazi dionez, Europa iparraldeko herrialdeetakoaren antzeko eskaintza egingo du kateak Espainiako Estatuan.

Letra txikiagoan eta albistearen amaieran, finantza alorreko informazioa jorratzen duen webguneak aipatzen ditu iberiar penintsulako merkatuan sartzearen zailtasunak: ikus-entzuleek, antza, edukiak doan deskargatzeko ohitura handiegia dute eta ez da erraza izango kutxatik pasaraztea

Izan ere, HBOren paratxutistek Europa hegoaldeko paraje hauek orain ikusi badituzte ere, hemengo ikus-entzuleek aspaldidanik ezagutzen dituzte euren edukiak. Eta abantaila lehiakor handiak eskaintzen dizkien zerbitzu baten bidez ikusi dituzte telesail gehienak: P2P sareen bidez doan deskargatuz.

Etorkizuna iragartzen hastea ez da nire helburuetarik, baina zaila iruditzen zait ezer pagatu gabe ikusi den zerbaitengatik inor ordaintzen hasteko prest agertzea, are gutxiago kontsumitzaile potentzial nagusiak diren gazteen artean –ez naiz hasiko hemen langabezia-datuak eta abar gogora ekartzen–.

“Follow the money“, The Wiren esaten zuten moduan: gustuak geroz eta homogeneoagoak diren munduan bizi gara, baina kontsumitzeko moduak –eta gaitasunak– oso diferenteak izaten jarraituko dute.