Testuinguru bakar batean ere ez dira zuzenak izango sarrera honen izenburuko formak zein horien parekoak.

Zuzenak: egosita, zuzenduta, erabilita, itxita, lotsatuta…

Horiek guztiak adberbioak dira eta forma aldetik aldagaitzak. Hortaz, forma bera erabili behar da bai singularrean bai pluralean:

• JokalariA nekatuTA dago.
• JokalariAK nekatuTA daude. (Inoiz ez *nekatuTAK)

OHARRA. Beste forma hauek ere zuzenak dira:

• JokalariA nekatuA dago.
• JokalariA nekatuRIK dago.
• JokalariAK nekatuAK daude.
• JokalariAK nekatuRIK daude.

Hona hemen Internet sarean topatutako oker batzuk:

a) *Egositak daudenean atera eta utzi hozten.

b) *Kurba Konikoak_ Ariketa Zuzendutak.

c) *Horrelakoak oso erabilitak dauzkazue.

d) *Fetuak nahiz eta begiak itxitak izan, alde batera eta bestera mugitzeko gaitasuna du.

e) *Batzuk pixka bat lotsatutak zeuden.

Modu honetan behar dute zuzenak izateko:

a) Egosita daudenean atera eta utzi hozten.

b) Kurba Konikoak_ Ariketak zuzenduta.

c) Horrelakoak oso erabilita dauzkazue.

d) Fetuak nahiz eta begiak itxita izan, alde batera eta bestera mugitzeko gaitasuna du.

e) Batzuk pixka bat lotsatuta zeuden.