Zuhaitz Ordoki / 2016-05-21 / 190 hitz
Azken 200 urteetan ez da egon bakerik ezagutu duen euskaldun belaunaldirik, eta atzerago begiratuta ere egon dira hamaika bataila, borroka eta matxinada. Dena den, azken 60 urte hauetako gatazkak gure iraganari gorputza moldatu diola iruditzen zait, testuinguru historiko bat eman digu eta bertan kokatu. Arrano beltza aldarrikapenak, Amaiurko gotorlekuak, literaturak, kantugintzak… iruditeria kolektibo bat sortu dute behin izan genuen Estatu edota Erresumaren existentzia barneratzeko. 2012an inflexio puntu bat bizi izan genuen, eta ordutik hona bizkaitar eta gipuzkoar bati baino gehiago entzun diet kostaldeko nafarrak direla azpimarratzen.
Guzti honen inguruan ikasi eta formatzeko aplikazioa sortu du Nabarralde elkarteak, gure Jerusalem galdutik zehar oinez goazenean sakelakoa atera eta inguratzen gaituzten elementuen inguruko ezagutza historikoa izateko. Honela azaltzen dute egitasmoa beren web orrian:
Iruñea ezagutzeko bisita gidatua
Iruñea bisitatzeko modu hoberena!
Bisita gidatu honek Iruñean barrena hainbat ibilaldi egin eta hiriaren leku adierazgarrienak ezagutzeko aukera emango dizu.
Iruñearen profila eta izaera zehaztu dituzten gertaera historikoak ezagutarazten dira gida honetan. Gidak hiru ibilbide proposatzen ditu hiriaren barrena eta argibide zabalak izango dituzu eskuragarri: testuak, argazkiak, ilustrazioak eta audiok.
Interneteko konexiorik gabe erabili daiteke eta 4 hizkuntzetan dago erabilgarri.
Eskuratu aplikazioa eta egin jauzi historian zehar zeure poltsikotik abiatuta.