Kutxabank ikasgeletan. Nork ireki dio azeriari oilategiko atea?

Mikel Garcia Idiakez / 2016-05-16 / 306 hitz

Jendea etxetik kaleratzen errege, klausula abusiboekin eta preferenteekin herritarrak itotzen aritua, bezeroei neurriz kanpoko komisioak kobratzeagatik salatua eta iruzur egiteagatik epaitegietan kondenatua, Kutxabank alegia, finantza ikastaroak ematen ari da ikastetxe publiko eta kontzertatuetan. Altruismoaren haizeak jo du eta iruzur horiek nola saihestu irakatsi nahi die bat-batean gaztetxoei, ala etorkizuneko bezeroak lotzea eta bankuen inguruan eraikitako kontsumismo eta ekonomia eredu jakin bat txikitatik barneratzea du helburu? Eta batez ere, nolatan ireki dizkiete parez pare eskolako ateak interes pribatuak dituen erakunde honi?

Pagotxa da Kutxabankentzat: gaztetxoen artean konfiantza eta fideltasuna sortu eta aurrezki kontua irekitzen dutenean bere sukurtsaletan egitea lortu dezake batetik; eta edukien kontrola bermatu dezake bestetik, nahi duena irakatsiz, eta nahi ez duena ez. Logikoagoa litzateke ikuspegi zabalagoa eman dezakeen –esaterako bankuek diruarekin egiten dutenaz, banku etikoez, alternatibez… ere hitz egingo duen– Ekonomia irakasle bat arduratzea ikastaroaz, eta ez interes pribatuei erantzuten dien banku bat.

Zertan datza ikastaroa?

Ikastaroa bi saio dira guztira eta Finantzak bizitzarako du izena. Saio horietako batean izan da ETB eta bertan erakutsi zaigunaren arabera, abiapuntua da “zure bizitzako ilusioa lortzea”, adibidez, ikasleei entzun diegunez, ziklomotorea erostea edota mugikorra zortzi hilabetetan erostea. Ilusioa egia bihurtzeko –dirua lortzeko– bideak aztertu dituzte ondoren, eta banketxeko ordezkariarentzat saioaren ondorio inportanteetako bat da “aurrezki kutxan dagoen dirua ez ukitzea”. Gazteetako batek dioenez, “libretan dagoen dirua hor uztea eta zuk irabaztea” baita helburua.

Jaurlaritzari galdera

Ikasturte honetan, Kutxabanken ikastaroetan 14-16 urte arteko 1.700 ikasle inguruk parte hartzea da asmoa. EAEko hainbat ikastetxe publiko eta kontzertatutan ari dira, eta EH Bilduk adierazi berri du ikastaroa kentzeko ahaleginak egingo dituztela. Eusko Jaurlaritzako Hezkuntza Sailari galdera ere egin diote saio hauen iturburua ezagutzeko, eta jakiteko, adibidez, ea ikastetxeek banketxearekin zuzenean lotutako ekimena den, ala administrazioak zerikusirik duen.

Martxa honetan, noizko Mc Donald’s elikadura burujabetzaz ikasgelan? Farmazeutikak osasunaz? Petronor ingurumenaz?…

Gaiarekin lotuta:

Hezkuntza merkantilizatzeko azken urratsa.

Unescok hezkuntzan hartu duen norabide ekonomizista salatu dute.

Utzi erantzuna

Zure e-posta helbidea ez da argitaratuko.