Egilea: Nancy Huston
Itzultzailea: Jon Muñoz
Argitaletxea: Alberdania
Urtea: 2012
ISBN: 978-84-9868-359-2
R: 6.782

Liburu labur bezain gogorra eta sakona, zenbait unetan dramatikoa ere bai. Eguneroko baten egitura du. Lucy Larsonek, bere 13. urtebetetzearen ondoren, ‘libreta’ honetan idaztea erabaki du. Errealitatean ez dituen gauzak izan nahi lituzke bertan.

Lucy Larson apaizaren alaba da eta gurasoekin eta lau neba-arrebekin bizi da, Albertan, Kanadan. 1936. urtean dago girotua. Urte gogorra da, krisi ekonomikoari izugarrizko lehortea gehitu baitzaio eta egoera larrian bizi dira, goseak bizi dira. Hala ere, duten apurra aitak etxera ekartzen dituen kanpotarrekin banatu behar izaten dute. Lucyri ez zaio justua iruditzen, ezin die etxekoei aurre egin eta bere salaketak eta gogoetak libretan idazten ditu. Ezin du eraman Jainkoaren borondatea omen diren hainbeste gauza latz pairatu behar izatea eta erlijioaz hainbat galdera eta hausnarketa idazten ditu; hitzen etimologiari buruzko hainbat ohar ere idazten ditu. Bere eguneroko monotonia aitak etxera ekarriko duen Bertrand Beauchemin medikuari esker apurtuko da. Apurka-apurka lagun egingo dira eta berarekin maiteminduko da. Honekin izandako elkarrizketen bidez, munduaz duen ikuspegia zabaltzen hasiko da, eta bere jakin-mina handituko da. Amak ez du begi onez ikusten medikua, medikuen elkartetik bota egin zutelako. Egun baten, gaizki ulertu baten ondorioz, amak etxetik bidaliko du medikua. Horrek Lucy erabat aldatuko du eta bizitzeko beste era bat izatea erabakiko du. Eliza, gizabidea, erantzun aurrez prestatuak eta halakoak erabat ahaztuta, libre izatea erabakiko du.

Hausnarketa bultzatzen duen liburua da. Izenburua ama eta Beauchemin doktorearen arteko anekdota baten ondorioa da.