Private.sh, zure pribatasuna babestuko duen bilatzailea

Jaione Dagdrommer / 2021-04-15 / 358 hitz

Google bezalako jarraitzaileek gure datuak erabiltzen dituzte egiten dugun bilaketa bakoitzeko. Bada alternatibarik ordea gure anonimatua babesteko. Ezagunena beharbada DuckDuckGo da, baina Private.sh ere indartsu dator.

Bilatzaileak webera sartzeko lehen geldialdia izan ohi dira. Nabigatzaileetan horren txertatuak daude, ezen askotan zuzenean bilatzen dugun helbide barran tekleatuz nahi dugun hori. Bilatzaile asko dauden arren aukeratzeko, Google da dudarik gabe ezagunena eta erabiliena. Kontua da Google-i ematen diogun informazioa Interneten gabiltzan bitartean bere beste zerbitzuek eta beste negozioek erabiltzen dituztela.

Denborarekin, Google behartuta dago gutaz gordetzen dituen datuak erakustera eta guk nahi bezala editatzeko aukera uztera. Hala ere, Google-k gure datuak erabiltzen jarraitzen du bere onuretarako. 

Google eta beste zenbait zerbitzuk zutaz gehiegi dakitela uste baduzu eta alternatiba eraginkorrak nahi badituzu, badago aukerarik. DuckDuckGo da erabiliena, baina badira beste hainbat bilatzaile ere, horien artean Private.sh

Private.sh sartzen garenean maskota lagunkoi bat aurkituko dugu lehendabizi eta bilatzaile koadro bat. Oraingoz guztia normal, ezta? Beste edozein bilatzaile bezalako da. Ezberdintasunak, ordea, bilatzaile koadro horretan hasten dira apur bat behatzen badugu. Bertan, herrialdea eta hizkuntza aukeratu daitezke, nahiz eta Private-sh ez dion gure nabigatzaileari non gauden galdetuko, Google-k egiten duen bezala. 

Nola babesten gaitu, bada, Private.sh bilatzaileak Interneten gauzak bilatzen ditugun bitartean? Hasteko, bilaketak zifratuak daude. Honela, bilatzaileak ezin du informazio hori biltegiratu. Hau da, bilatzaileak ez daki zer ari garen bilatzen. Bigarrenik, proxy baten atzean ezkutatua geratzen da IP-a, hau da, ez du jakingo nondik bilatzen dugun edo zer gailutatik ari garen bilaketa hori egiten. Azkenik, bilatzaileak gure galdera deszifratzen du bilatzeko eta ondoren emaitzak zifratzen ditu. Guk nahi ditugun emaitzak eskuratuko ditugu, baina gure pribatutasuna trukean eman gabe. Guzti hau segundo gutxitan egiten du, guk nabaritu ere egin gabe. 

Egungo nabigatzaileek bilatzailea zuzenean nabigatzailean txertatzeko aukera ematen dute, ez daude ordea bilatzaile guztiak. Private.sh-ren kasuan oraingoz bilatzaile hau bilatzeko zuzenean bere webgunea tekleatu beharko genuke.

Bilaketari dagokionez, oraingoz emaitzak antolatu gabe ematen ditu, hau da, informazioa iruditan, albistetan, bideoetan edo esteketan banatu gabe. Nahiz eta webgunean edo albisteak bilatzeko aukera ematen duen. Galdera zehatzak erantzutea ere kostatzen zaio. Hala ere, zerbait zehatza bilatzen baduzu aurkituko duzu. Bilatzaileak, denborarekin, bere bidea egin ahala gauza guzti hauek fintzen joango dira, beraz, pazientzia!

Utzi erantzuna

Zure e-posta helbidea ez da argitaratuko.