Testuingurua: gela honetan ikasle gehienak etxetik erdaldun datoz, batzuk Haur Eskolan hasi ziren euskara ikasten eta beste batzuk eskolan Haur Hezkuntzan  3 urterekin. Ingurune soziolinguistikoari dagokionez euskaldunen proportzioa  gutxi gorabehera % 20aren bueltan dago.

Ikasmaila: HHko 3. maila (5 urte)

Ikasle kopurua: 16

Ikasgaia eta irakaslea: tutorea eta hizkuntza irakaslea.

Helburua:   Euskarazko aho korapiloak ikastea erabiltzeko eta zeharka hizkuntza erabiltzeko gogoa piztea.

Esku-hartzearen deskribapena: 

• Irakasleak aho korapiloak errutina moduan landu ditu,  jolasa eta erritmoa erabiliz eta horrela  hiztegia eta zenbait fonema ikasiko dituzte ikasleek. Dinamika hau errutina bihurtu nahi dute bi arrazoiengatik: alde batetik, ikuspegi pedagogikotik errepikapenaren bidez ikasleek oinarrizko jakintzak hobeki menderatzen dituztelako eta erritu guztiek bezala, segurtasuna transmititzen dielako, eta beste alde batetik ikasleek eskatzen dituztelako. Hori dela eta, programazioan eta lehendik ezarrita zituzten errutinetan txertatu dituzte. 
• Aho-korapiloak esatea ikasleei erronka moduan proposatu zaie eta irakasleak horiek probatzera animatu ditu.  Horretarako taldekatze desberdinak egin ditu: talde handian aurkezten ditu, aho-korapiloak talde txikitan errepikatzen dira ahotsa modelatuz (altuago, baxuago, motelago, azkarrago...) eta ondoren dramatizazioaren bidez landu dira (uretan sartuta egongo bagina bezala, hotzeria edukiko bagenu bezala, nekatuak egongo bagina bezala...).