Saltatu nabigazioa

4.5c Ibaia

Komeni da, noizbehinka, ikasleei espazioa ematea hizkuntzarekin lotutako emozioak eta bizipenak azalarazteko. Esaterako, norberak bere hizkuntza biografia egitea eta besteei azaltzea hizkuntzarekiko lotura berresteko baliagarriak izan daitezke; ikaskideenak entzutea, berriz, ikuspuntu eta hiztun izateko modu ezberdinak daudela ulertzeko bidea.

Esku-hartzearen testuingurua eta deskribapena

Testuingurua: Ikasleek gelan haien artean euskara eta gaztelania tartekatzen dituzte. Ikasgaiari buruz euskaraz egiten dute baina haien arteko eztabaida edo komentarioak gaztelaniaz egin ohi dituzte. Gelatik kanpo gaztelaniaz egiten dute ia dena. Mintzatzean hizkuntzak nahastea ere ohikoa da. Ikastetxea kokatuta dagoen herrian euskararen presentzia soziala txikia da. Laster, Derrigorrezko Bigarren Hezkuntza bukatzean, hirira joanen dira gehienak, Batxilergoa edo Lanbide Heziketa egitera.

Ikasmaila: DBHko 4. maila

Ikasle kopurua: 19

Ikasgaia eta irakaslea: Tutoretza

Helburua: Ikasleek euskararekin duten atxikimendua azalera atera eta indartu. Euskaraz ez erabiltzeak dakarren kontraesana agerian utzi.

Esku-hartzearen deskribapena:

  • MSB webguneko Ibaia jarduera gelarako prestatu. Egindako egokitzapenak:
    • Testua aurretik grabatu zuten, zatika, ikasleek Haur Hezkuntza eta Lehen Hezkuntzan izandako irakasleek eta eskolaz kanpoko txikitako hezitzaileek.
    • Saioaren hurrengo astean musikari euskaldun bat gelara etortzekoa zela aprobetxatuta, eskatu genion berak bere ibaia egina ekartzeko eta bere biografia linguistika ikasleei azaltzeko. Musikariak proposatuta, Ruper Ordorikaren ibaia kanta abestu zuten denok elkarrekin.

Atxikimenduaren osagaiak

Galdera

... atxikimendua elikatzen duten zer osagai landu du irakasleak jarduera honekin? 

Erantzunak

Afektibo-soziala

Pragmatikoa

Hausnartua

Sinboliko-kulturala

Feedbacka

Zure ustez, zer gertatu da?

Galdera

Irakasleak aukeratu duen jarduera egokia da helburua lortzeko? Zure ustez, zer aurreikuspen egin daiteke? Beheko aukeren artean, zer gertatu da eta zer ez? (Aukera bat baino gehiago marka daiteke).

Erantzunak

Jarduera egokitzeko irakasleak hartutako lana emankorra izan da.

Hurrengo asteetan ikasleen arteko euskararen erabilera handitu da.

Ikaskideak hiztun gisa hobeki ezagutzeko eta ulertzeko baliagarria izan zaie ikasleei.

Oro har, euskararekin duten loturaz kontziente izateko baliagarria izan zaie ikasleei.

Jarduera baliagarria izan da irakasleak ikasleak hobeki ezagutzeko.

Ikasleen hausnarketa maila handia izan da.

Feedbacka

Jarduera prestatu zuen irakaslearen balorazioa

"Emaitza oso positiboa izan da. Gehienak berehala sartu dira proposamenean eta hasi dira ibai pertsonala marrazten. Batzuei, dena den, bizipenak "ibai" bihurtzea kostatu zaie eta blokeo puntu bat ere egon da bakan baten kasuan.

Testua txikitan erreferente izan zituzten euskaldunen (gurasoak, irakasleak, aiton-amonak...) ahotsetan entzuteak harritu ez ezik hunkitu ere egin ditu. Beraz, testua horrela grabatzea ideia ona izan da.

Hausnarketa maila ez da oso handia izan, izan ere, ikasleak bizipenetan zentratu dira gehiago. Esaterako, harrituta gelditu dira batzuek kontatutako egoera eta kontu familiarrekin. Hala ere, egia da batzuek aipatu dutela euskara haientzat garrantzitsua dela eta gehiago erabili beharko luketela.

Beste egitasmo bat zela-eta etortzekoa zen musikariari eskatu zaio bere ibaia kontatzeko, musikariaren inplikazioa bikaina izan da eta halaxe egin du. Oso  emankorra izan da eta dimentsioa eman dio jarduerari. Ikasleek oso gustura entzun dituzte erreferentea duten pertsonaren bizipen linguistikoak. 

Bestalde, denbora muga izan da. Ikasle guztien ibaiak lasai azaltzeko bigarren saio baten zati bat erabili behar izan genuen. Hasieran horretaz pentsatzea eta, malgutasunez, jarduerari jarraian bi saio eskaintzea izanen zatekeen hoberena. Izan ere, ikasleen bizipenak lasai eta errespetuz entzutea da, kasu honetan, garrantzitsuena."