Irakurri irakaslearen balorazioa eta erantzun galderak
Ikasleei jarduera azaldu zaienean harrera ona izan du, hasieran neskek interes eta inplikazio handiagoa erakutsi dute, baina segituan mutilen parte-hartzea ere parekatu da. Orokorrean, sokasaltoan interes handiagoa erakutsi dute: abesti berriak ikasiz, beste batzuk birgogoratuz eta abestiren bat elkarbanatuz ere bai, alegia, gutxi batzuek ezagutzen zuten abesti bat.
Poliziak eta lapurrak jolasaren lanketa teorikoagoa izanda, gehiago kosta zaie inplikatzea baina talde txikitan banatu direnean, erantzuna hobea izan da.
Sokasaltoan aspaliditik ibiltzen ez ziren ikasle batzuk ohartu dira abesti batzuk ahaztuak zituztela eta aipatu dute gogoraraztean txikitako oroitzapenak sentitu dituztela. Poliziak eta lapurrak jolasari izen euskaldunago bat ematerako garaian zenbait ideia izan dituzte: urdinak eta beltzak, deabruak eta aingeruak, angurriak eta meloiak.
Ez dut zailtasunik aurkitu jarduera prestatu edo aurrera eramaterakoan, oso talde parte-hartzailea da eta lana erraztu didate, egia esan.
Taldearen erantzuna oso ona izan da, autonomia handiarekin aritu dira, hala ere, laguntza eskaini diet eta jolasgaraian behar zuten laguntza eman diet, sokasaltoan ere aritu naiz beraiekin; eta ohartu naiz haiekin aritu naizenean, beraien motibazioa baita beste ikasleena ere handitu dela.
Esango nuke planteamendua nahiko egokia izan dela, baina denbora aldetik agian jolasgaraia baino lehen beste pare bat saio gehiagotan landu izan bagenu, ikasleek segurtasun gehiago izango zuketen aurrera eramaterako garaian.